與契媽和姨姨的約會

2008/08/31

今日約左寶寶既契媽和姨姨上黎屋企聚會
自從大家各自有個家庭之後
各有各忙都好少聚埋一齊談天說地呢!!!



明年寶寶就會有個契妹或細佬
因為契媽已經身懷六甲了
真係可喜可賀!!!
好開心又多個朋友榮升做媽咪級
我地得閒又可以一齊講下湊仔經喇!!!



姨姨唔知幾時輪到你呢...

終於打勝仗

2008/08/30

寶寶終於打勝仗喇!!!
但就令到媽咪, 婆婆和姨媽都相繼中招
而家d病菌真係很利害
一個人傳染三個人…
不過睇見寶寶回復番笑容和食慾
就算媽咪病都七彩都無所謂呢 ^_^

有米糊食..yummy..


我要高飛！


寶寶很喜歡這個學行玩具(鳴謝送出玩具的哥哥)


寶寶睡覺時的左右護法(鳴謝送出左右護法的姐姐)

百厭仔

2008/08/26

婆婆話湊過咁多個仔女和孫女
都未湊過好似寶寶咁百厭
鍾意企多過坐
鍾意攀爬欄杆多過玩玩具
就連洗白白都係無時停
係浴盆度周圍郁唔可以坐定定
寶寶就黎要企係度洗白白架喇!!!

係咪仔仔真係百厭d既呢??
但我見人地d仔仔無咁活躍架喎...

媽咪話 : 婆婆, 要你幫我湊呢個百厭仔, 辛苦你喇!!!

寶寶 : 爸爸..你又偷影我既浴照


寶寶 : 我唔會咁易比你影到既..hehe

打仗中 - 氣管炎

2008/08/24

寶寶食左藥已經退左燒了
但咳咳和流鼻水就嚴重左
婆婆今早再帶寶寶去睇私家醫生
醫生話寶寶有氣管炎
開左特效抗生素和止咳化痰傷風藥水


睇見寶寶病到無晒心機..


又無左個包包面..


媽咪真係好後悔無細心呵護你
才令到你生病受苦
希望你食左藥快些康復
做番個活潑可愛既小寶寶啦!!!

寶寶第一次打敗仗

2008/08/22

寶寶第一次打敗仗...
唔通真係bb過了六個月之後
身體抵抗病菌的免疫能力會差d既??

話說琴晚已預料天文台會今早掛八號波
難得又有一天風假
我和爸爸當然唔會錯過好好訓大覺既機會
但今天晨早收到婆婆來電
話發覺寶寶有輕微發燒
我和爸爸立即趕回去睇寶寶
用紅外線耳額探熱針量度有36.6度
由於探熱針會有偏差唔係太準確
而且怕寶寶會越燒越高
安全起見都係帶寶寶去醫院睇急症
因為颱風關係醫院門診部都有些人排隊等候

登記完後就去探熱處探熱已經有37.5度喇

而寶寶亦開始顯得有點疲倦

幸好只係等了約一個鐘頭就見到醫生
醫生話寶寶受細菌病毒感染
開了一支退燒和止咳藥水
診金+藥物埋單成為二百三十元正

初頭寶寶食退燒藥都好乖肯食

但食到止咳藥水就獲利回吐
吐完之後就驚左唔係太肯食藥丫
睇見寶寶咁樣媽咪真係好心疼
但唔食藥又點會病癒呢...

第一口自家粥

2008/08/19

今日婆婆特登買了一個細煲仔
煮了一煲美味既魚味粥給寶寶品嚐
寶寶都很喜歡吃婆婆煮既愛心粥呢 ^_^
而家寶寶中午會吃一碗糊仔
晚上就會吃一碗粥仔
其餘三餐就會飲200ml奶奶
咁就可以吸收不同既營養啦!!!

難道寶寶想留番粒米做宵夜??


第一口自家粥


拎著尿片周圍行

寶寶半歲大丫

2008/08/18

還記得半年前既今日凌晨三點正
有一個可愛小寶寶的誕生...



眨下眼...今天已經半歲大喇!!!





因為今天剛巧係婆婆生日
所以一家人與兩婆孫一齊慶祝
當然婆婆先係主角, 寶寶只係猛車邊做配角啦







今次我地去北角海逸酒店食buffet
果度都有很多不同食品選擇
爸爸抱著寶寶周圍行睇下有咩好野吃
最後幫寶寶揀了一碗白飯+魚肉
寶寶食得好yummy架...



當然寶寶主打都係飲奶奶
要飲多d奶奶吸收營養先快高長大架麻



飲飽食醉就係時候去搵周公傾計
周公果然隨傳隨到...
仲傾到我地食飽先起身呢!!!





寶寶, 祝你半歲生日快樂!!!
希望你身體健康, 快高長大!!!
聽敎聽話, 記得做個乖寶寶呀!!!

半歲人仔 - 學習篇

2008/08/17

寶寶明天就半歲人仔丫

學識左好多野喇...

有時會自己拎住奶樽飲奶
不過只係拎一陣就會放手唔拎
因為懶豬知道婆婆和媽咪會幫佢拎



而家學識周圍爬...仲爬得好快添
只要有目標就會向前爬呀爬呀...







第一隻牙仔仲吽緊未出世
當寶寶牙痕果陣就乜都咬一餐



而家就最鍾意企係度
扶住d野仲企得好穩架
不過仲未學識坐穩



其實照顧寶寶一整天都幾辛苦架
因為寶寶實在無時停
成日都周圍爬周圍郁
除左訓覺停一停之外
都唔願乖乖坐低抖一抖
有時媽咪仲以為自己生左隻馬騮仔呢

尋找草場上的腳指

2008/08/16

今日爸爸公司的足球隊有比賽
我地一家三口就去觀賽和影相
話說爸爸想帶寶寶去球場影靚相
媽咪就幫寶寶著鞋仔可以踏下草地
點知寶寶著左鞋仔後就一直望住自己對腳
連鏡頭望都唔肯望
直至幫佢除左對鞋仔先肯望番鏡頭
可能寶寶奇怪緊"點解唔見晒d腳指既??"
因為我地帶寶寶去街都好少幫佢著鞋仔
或者令到佢唔習慣著鞋仔掛..哈哈哈

爸爸帶寶寶到球場踏草地


媽咪..我d腳指唔見晒呀!!!


傻豬..除左對鞋仔咪有番d腳指囉..


爸爸..你作弄我丫..我扯你d頭髮..哈哈


媽咪 >8< 寶寶

雙面寶寶

2008/08/14

近排寶寶化身做雙面人
日頭和夜晚既行為係好大分別呢..
日頭時..寶寶任人抱..又會笑面迎人
但一到夜晚..就成為婆婆貼身膏藥
任何人(包括媽咪)抱住都扭喊扭計
有時連餵奶都唔肯比媽咪餵
但只要婆婆一出手就收聲
所以我地封左婆婆係寶寶止咳劑呢!!!

寶寶..媽咪每晚放工都黎睇你
但你連媽咪都唔肯跟
你知唔知道媽咪好心痛好唔開心..
希望呢段時間只係一個過渡期吧
你幾時先會再做一位笑面寶寶啊!!!

寶寶咬緊乜野咁肉緊丫..


原來係咬緊牙仔餅..


小明星呀..快d黎影相啦..

學識爬爬喇!!!

2008/08/13

寶寶終於識爬爬啦...
見到寶寶最初由用頭頂著爬到而家用手去爬
呢個轉變真係令到我和爸爸都好開心
寶寶叻叻仔呀!!!

寶寶向著目標(床既欄杆)進發


變身馬騮仔上樹


爬爬實錄

BK 0802半歲party

2008/08/10

今日係BK0802半歲party的大日子
總共有38個family參加今次個party...媽咪都未試過參加過咁多BB既party呢
地點係旺角pom cafe 3樓舉行

這個場地提供一對巨型Mickey & Minnie公仔比各家庭影相


寶寶 : 媽咪..有兩隻大怪獸呀!!!


媽咪 : 唔洗怕..有我陪著你麻..第時你可能會愛上呢兩隻怪獸架..


0802半歲party正式開始啦...
不過寶寶掛住搵周公
媽咪唯有醫住自己個肚仔先啦



寶寶訓醒後當然唔會錯過去搵朋友仔影下相...


晴晴..點解今次你唔拖我手仔既


原來小希希係我搵周公途中乘虛而入


彤彤..我有心事同你傾訴呀


寶寶..乖乖唔好喊啦


Emmy..你條口水肩好靚啊...


周公急call寶寶, 妹妹係咪都收到call呢?!?


今次無緣同蠶蠶影張twins相添 (因為寶寶和蠶蠶輪住搵周公傾計)


Irina個小皇冠好cute呀...


生日會當然有美味既生日蛋糕啦...yummy


妹妹 : 西瓜仔和牛牛係咪唱緊生日歌二重奏呀?!?!


今次party搞左三個BB投票選舉比賽 :

1.[最似爸媽餅印BB選舉]


2.[最甜美笑容BB選舉]



3.[最正斗造型BB選舉]
媽咪幫寶寶打扮"牛牛"造型去參賽

** 多謝各個family支持得到亞軍 **

牛牛就係敗係西瓜仔手上


企鵝仔和旗袍妹妹得到雙季軍



每個家庭都有份既lucky draw和sponsor禮物


終極幸運大抽獎得獎者--蠶蠶family


今次很開心能夠成為籌備party既其中一份子
亦因為咁而認識了九位媽咪朋友
倩明, Jenny, Queeny, Sally, Claris, Carmen, Janet, 阿Lui (媽咪和Jacqui玩失蹤)


因為今次爸爸負責做大會攝記
所以只有媽咪獨力照顧寶寶
同埋寶寶唔係去搵周公就係扭計唔合作
都無乜機會去認識每位媽咪和bb添
不過唔緊要, 下次gathering實有機會再見呢!!!

Thank you all mama!! See all again later!!

P.S. 實在太多靚相未能盡post, 如有興趣想睇多d就去以下呢個網頁啦 --- http://picasaweb.google.com/hoholuk/080810