幼潛@第2堂

2009/05/31

今日豪豪精神幾好又無發燒...應該已經好番晒喇  所以我地都決定帶佢返幼潛上堂...由於我地早到左就係課室外等候...等候期間阿仔仲與女同學仔一齊玩玩具呢

當小朋友聽到郭姨姨唱 「時間又到差唔多..叮叮叮叮噹...」佢地已經開始習慣自動自覺將玩具放番落個玩具箱度了  跟住就圍埋一齊唱歡迎歌「小朋友小朋友...歡迎來參加...我請大家先坐下...一齊開心下...」(每堂都要唱呢首歌兩次...家長們已背熟了)

例牌遊戲一 : 每位小朋友派發一個沙搥...一邊唱歌一邊搖動沙搥...左右手各一次...之後要跟隔離小朋友交換沙搥...阿仔今堂竟然肯與同學仔交換沙搥...今次明顯有進步喔

遊戲二 : 每位小朋友派發三舊小積木...要將它疊高和並排...但阿仔對疊積木無興趣...係課室周圍走...就算姨姨教佢練習都唔肯做

遊戲三 : 姨姨拎個大公仔出黎要小朋友互傳...阿仔對大公仔又係無乜興趣  初時都唔肯接收和傳遞比同學仔...不過玩多幾次都算肯玩啦...

遊戲四 : 食茶點...每位小朋友派發一片餅乾...要佢地用前兩隻手指拎...阿仔咁為食當然做得到啦

遊戲五 : 姨姨拎出一大袋有點重量既紙巾盒...每次要小朋友將兩至三個盒由課室前端搬運到後端 (家長們企係後端)...阿仔係呢個練習做得最好...搬完一次又一次..個盒跌左落地又會跪低執番再搬過...連姨姨都話佢做得好好添

每次完堂前十分鐘...姨姨都會同家長們講解遊戲目的和讓家長們發問問題...但我呢班家長們都算比較被動...就算有問題都等下堂後自己問姨姨...所以好快就散會唱goodbye歌了

P.S. 郭姨姨今堂同我地講話發覺阿仔雙眼有少少假豆雞  話再留意多幾堂...如果真係既話就教我地一些辦法去幫助阿仔改善呢個情況...其實我覺得呢個姨姨都算ok...課堂講解都算清楚...都肯用心教導小朋友...同埋佢都會留意各小朋友既情況唔係上完堂就收工果種導師呢...

阿仔靚仔俊俏樣

阿仔扭計醜怪樣 

生病記

2009/05/28

今日摸摸豪豪個額頭和身體都有少少熱...但用探熱針探又無發燒喎...不過就有少少鼻水...可能又作感冒冷親啦...又見佢幾精神食得又玩得...所以就無帶佢睇醫生..只係比左d退燒藥佢食...

2009/05/29

婆婆話豪豪都仲係有少少熱...所以就決定帶阿仔去醫生...醫生診症話阿仔傷風感冒之類...食左d藥又好似真係好番d喎...唉...呢d錢真係唔慳得..睇完就心安理得...

2009/05/30

我地見阿仔悶悶地就帶佢落公園玩下...但落到公園後...阿仔一反常態對公園d設施都好似提不起勁咁...可能仲係有d唔舒服...所以無心機玩啦...

我地係公園玩左一陣就去左大家樂tea一tea...雖然阿仔唔舒服...幸好胃口都唔差...我地食乜佢又食乜...仲係度周圍八卦周圍走...果度d職員嬸嬸又走過黎同佢玩...所以想佢乖乖地坐定定係high-chair食野都幾難...食飽後就係商場行一陣回家了...

又到食藥的時候...幸好阿仔已無嘔藥情況發生...阿仔要乖乖地食晒d藥呀...咁樣病菌就會遠離你架啦...

爸爸的新玩具

2009/05/26

話說爸爸部相機係上次去黃金沙灘時無拉拉壞左...但返到屋企又影到相無事喎...一心以為有人奸計未能得逞啦...點知部相機迴光反照了一日就say goodbye了

爸爸就梗係興高采烈啦..終於有藉口買過部新型號相機麻  佢上網左睇右睇...終於買左部新二手相機...價錢好似仲幾抵添

難得買左部新相機..爸爸又點會放過豪豪呢個御用model呢

探契妹的bb

2009/05/24

今日我地上完幼潛之後就去左契妹屋企探bb...等bb長大一點就又多個細佬仔陪豪豪一齊玩哩...隔左一陣...豪豪's契爸媽都上埋黎...可惜佢地個bb仲太細...所以今次無帶埋出黎見面...如果唔係串燒三兄弟就可以聚首一堂啦  希望再過多幾個月..我地三姊妹可以一齊抱住三兄弟影番張合照啦

媽咪左擁右抱

 

幼潛@第1堂

2009/05/24

期待以久既幼潛今日開始上堂啦...可惜天有不測之風雲...外面勁落大雨...打開電視機睇天氣報告又未有掛黃雨紅雨...搞到我個心都十五十六...究竟帶唔帶豪豪返學好呢?? 左諗右諗之下都係收拾行裝準備出發 (我地返兩點鐘班)...我地係一點鐘臨出門口時就睇到天文台發出黃雨警告...係咪玩野呀?? 咁即係使唔使返學呀?? 即刻打電話去幼潛中心..點知打極都接通唔到...一路打一路心諗黃雨應該會取消上堂掛...好彩最後都被我接通左...中心職員話佢地有派發風暴指引比家長...十二點鐘掛黃雨就會取消上堂...但如果之後先掛就會照常上堂...掛線後我地立刻拿拿淋帶住阿仔冒雨搭車返學... 

由於H1N1既關係...原本可以父母一齊親子班既幼潛...而家只可以一位家長陪同上堂...爸爸唯有係課室外面等候啦...講真我地都係因為可以父母一齊陪同上堂先至報名參加...呢個變更實在令我地太失望...亦令我地原本打算報讀第二期幼潛都要作重新考慮...

可能有些家長以為黃雨唔使返學...所以今堂只有四位小朋友上堂...亦因為咁少人...導師郭姨姨都破例容許爸爸們可以入課室一齊上堂...實在太好了...未上堂前...小朋友們就係玩具箱拎玩具玩...阿仔初頭對環境都陌生...唔敢周圍行...係都要拉住我一齊...不過玩玩下就適應左了...

姨姨助手拎左玩具箱出黎要準備收拾玩具..當姨姨數左十聲後小朋友就要bye bye玩具...將玩具放番入玩具箱裡...很驚訝地阿仔竟然肯自動自覺放番入箱...因為之前返過一些PG試堂...阿仔喊住都唔肯放手架...似乎阿仔大個仔啦...

大家圍埋坐低就開始點名上堂...姨姨就唱歡迎歌歡迎各位小朋友...唱完一次又一次...奇怪地阿仔又好專心坐定定聽歌仔...唔通首歌好好聽..哈哈...

遊戲一 : 每位小朋友派發一個沙搥...一邊唱歌一邊搖動沙搥...左右手各一次...之後要跟隔離小朋友交換沙搥...阿仔當然十萬個唔願意...c都唔肯同人地交換 (教導小朋友模仿社交行為)

遊戲二 : 每位小朋友派發一張牛油紙...撕開張紙...跟住就用膠水貼係白紙上...呢個遊戲看似簡單...但阿仔對張紙一d興趣都無...更何況要佢又撕又貼...所以最後既勞作都係我幫佢完成 (幫助小朋友發展手指靈活性)

遊戲三 : 每位小朋友派發一碟涼粉...阿仔初頭都好抗拒呢碟野...可能黑漆漆又軟淋淋...所以掂都唔想掂...後來我捉住佢隻手去摸下督下...佢又覺得幾得意幾好玩喎 (刺激小朋友既觸角感)

完成三個遊戲之後...姨姨就叫家長們坐埋一齊講解玩呢d遊戲既目的...而小朋友就係度玩玩具或者係課室走來走去...最後大家唱埋goodbye歌就放學了...