我們的寶寶: 3月 2009

2009年3月31日星期二

蕃薯仔

2009/03/31

話說某日行完街準備排隊搭小巴回家時

突然間我好想食熱辣辣烘蕃薯就同老公講下

老公就話今日蕃薯伯伯無開檔喎..不如下次先買比你食啦

跟住我就同老公講..下次我又未必想食了

點知隔左一日

我放工回娘家時就見到一袋烘蕃薯放係檯面

原來老公都會將我所講既「無聊話」放入心裡

的確很窩心喔..多謝老公

每次無論我地吃什麼..豪豪都會走埋黎吃埋一份

今次當然唔例外..仲食完一啖又一啖添

還記得小表姊細個果陣時食過一次蕃薯之後就變左蕃薯妹

以後成日都話要吃蕃薯..蕃薯糖水係佢既至愛

唔知阿仔今次食過之後會唔會都變左蕃薯仔呢

2009年3月30日星期一

2009/03/30

今晚打開信箱收到一封信~幼潛入學信..我真係興奮到跳起...

從來都無諗過會係第一個收生階段就收到信...因為我知道每期幼潛都有許多家長報名...而呢間PG收生人數又唔算太多...所以每期都係用抽籤形式去收生...我先前已經打電話問過果度d職員..我抽到個籌號只係4XX...即係話能夠抽中既機會率不高...所以我都已經打定輸數...只係妄想有其他小朋友退出或者會有機會輪到我...點知今次真係好lucky...可能我報名填時間填左六個choice大包圍...所以相對抽中機會率提高左啦!!!

豪豪...你要珍惜今次上學既機會丫...

2009年3月29日星期日

手拖手。行街街

2009/03/29

每逢星期六日..就算當日沒有特別節目..我和爸爸都會帶豪豪出街逛一逛..有時會到公園玩耍..有時會去附近商場行街..盡量都少留係屋企..一來阿仔而家學識行路..開始對周圍事物感到好奇..如果成日留係屋企只會阻礙佢發展空間..而出街就可以比機會佢周圍睇下摸索下..二來我地放假都想出去relax下..我覺得有時唔需要花一分一亳..只要一家人手拖手去街街就已經最開心呢!!!

其實我好鍾意一家人手拖手呢種感覺..覺得好溫馨好幸福..我和爸爸都知道他朝有日..呢個場面會逐漸減少出現..因為當阿仔長大後就會fing開我地雙手..自己去探索新天地..雖然阿仔而家學識行路..但幸好都仲肯比我地拖住手和抱抱..所以我地都覺得要珍惜現在..只要阿仔想要拖手或要抱抱..我地盡量都唔會托手踭呢!!!

2009年3月28日星期六

玩轉詩翹club+house

2009/03/28

我地和蠶蠶family上完PG就出發去TKL...事關約左班朋友仔一齊去詩翹媽個club house玩...但未去club house前就先上詩翹家搗蛋...詩翹媽拎晒所有玩具招呼小朋友..五位小朋友睇見d玩具就雙眼發光...係屋企度周圍行...玩玩具...好開心喔

豪豪和細細個對蠶蠶玩緊個車盤都好有興趣...一齊出手搶

呢張玩具檯真係好吸引...引晒五位小朋友埋黎一齊玩

係屋企玩左一陣..我地就出發去Club Kid Anderson

呢個playroom既area真係好大...就算有很多小朋友同時間係度玩都唔會覺得擠迫...可想而知有幾大同埋呢度周圍都鋪滿晒地墊...岩晒我地d行路行到飲醉酒既小朋友係度周圍走..包保唔會跌親撞親...令我地感到安全又放心

首先係小BB區度玩玩具屋...

跟住到大BB區玩sir滑梯...

點解阿仔扁晒咀既...原來係度扭眼訓

飲飽奶就係呢張sofa度訓覺叉叉電

阿仔訓醒後又跟細細個再戰sir滑梯

今日詩翹媽仲送左份禮物比豪豪添..真客氣丫

姨姨...我好鍾意呀...多謝您

試堂記@One Music Centre

2009/03/28

今日帶豪豪去呢間係音樂類型既PG...阿仔平時咁鍾意聞歌起舞..我估應該會幾enjoy..而且上課地點係太子...今次又有蠶蠶做同學仔相陪..所以我又比左兩條紅衫魚試下堂啦...由於阿仔上堂前比我地係夢中摷醒...所以心情有點麻麻地...比個沙搥佢玩都無反應...

呢間PG既導師會走埋學生身邊逗玩..讓學生投入上堂氣氛 (呢樣野我幾like)

每次玩完一樣樂器就要講bye bye...每位小朋友都很乖自動自覺把樂器放入箱裡..阿仔初頭見其他小朋友放都有d想放...但最終都係唔肯放手..導師唯有用第二樣樂器同佢交換啦...

一邊聽音樂一邊打鼓...

又玩另一種樂器...

聽住音樂係課堂周圍走走跳跳...

阿仔熟習左環境後就係課室裡周圍探索...

總結黎講...呢間PG無論係上課地點/導師/課堂種類..我都覺得ok...唯一係上課時間就要與爸爸再商量下...因為我和爸爸都prefer一齊陪阿仔親子上堂...如果報上午班..我就要隔星期六先可以相陪..但報下午班時間又麻麻地...所以都係無即場報名上堂...返屋企再諗清楚先算...

2009年3月25日星期三

「真」「假」電話

2009/03/25

唔知點解每個小朋友都愛玩「真」電話...豪豪係極度非常之愛果種...由最初拎住屋企個電話筒扮聽電話...到而家用手指仔去按電話號碼...仲要咩號碼都唔按..硬係鍾意按「9」字...可能有時只係有咁岩得咁橋...但萬一有日睇唔住..比佢按左3條9咁點算呢...其實除左按電話制之外..全間屋燈制/電器制..所有佢可以按得到既制..佢都鍾意按按按..同佢say no/打手板...咩方法都制止唔到佢果隻「探索之手」...真係令我地非常極之苦惱