哥哥N1@第一階段

2010/08/03

我公司因為唔方便請假...所以呢個星期都係由爸爸陪哥哥返學上堂...撞岩爸爸返夜班...佢放工返屋企訓三粒鐘就要起床陪哥哥返學上堂...待哥哥放學後就帶返婆婆屋企照顧...自己就返屋企再訓過...訓到下午就返工囉!! 爸爸...呢個星期辛苦你啦 ... 

每日爸爸接完哥哥放學後都會打電話向我匯報哥哥返學上堂既情況...免我掛心哩...

今日哥哥開頭又係痴實爸爸...之後與老師同學仔一齊玩彩虹傘先好番d...

2010/08/04

每日上堂前老師都會同小朋友們熱下身...唱歌仔跳跳舞...但哥哥唔係太鐘意...唔肯出去跳...之後玩得最開心係與同學仔互推健身球...跟住和爸爸做勞作...用章糊貼圖案去畫紙...

2010/08/05

今日哥哥既表現無o甘樹熊...肯自己係校門前換白鞋入課室...又肯聽老師指令做野...有進步喔...

2010/08/06

由今日開始爸爸無得陪伴...哥哥要學習自己上堂啦!! 未到校門前已經同哥哥講過做定心理準備...哥哥入課室前要換鞋...換完鞋爸爸話要走時...哥哥就拉住爸爸隻手唔放...入到課室後...老師話可以玩車...爸爸帶哥哥去坐車後就偷偷溜走...爸爸一小時後回到學校接放學就見到哥哥係度喊...老師同爸爸講番當佢走左後...哥哥都繼續玩車玩波...但夠鐘要泊車時哥哥就開始喊喇...老師見佢條尿片濕想同佢換...佢就話要爸爸換...食水果時又唔肯食(因為今日係食蘋果)...老師話哥哥今日既表現都尚算OK...而且仲好驚訝爸爸走時哥哥竟然無喊添...呵呵...哥哥有車玩爸爸係邊都唔記得啦...試下如果無車玩時仲唔一早爆喊咩...哈哈哈!!!