豪豪14個月大丫

2009/04/18

話咁快豪豪14個月大丫...真係有點不捨...

原本諗住今日weekend可以帶阿仔出街逛逛...奈何d病菌唔肯遠離佢...

阿仔已經睇左三次醫生...食左藥都依然係咳到唔停咀..有幾次食藥仲食到嘔...睇見佢食到咁辛苦...我就更加心痛肉赤...但唔食藥又點會有機會好番呢...如果食埋今次d藥都唔掂...真係要轉睇下中醫先得...

阿仔食奶量又食少左...未病前就食得晒一支奶...而家就食得半支奶...好彩都仲肯食下粥仔/糊仔/零食補充番d..原本阿仔都唔算重量級人馬..而家病左甘耐肯定成個人輕磅晒啦...

爸爸..呢支槍有咩作用架??

傻豬...用來幫你探熱架...

阿仔笑得咁開心...一陣你就笑唔出了

用星星餅送藥水...

先比些甜頭...

後餵藥水...

可能阿仔食藥食到麻木晒...已經無乜反抗了...食完又繼續同爸爸玩...而家阿仔有七隻牙仔..第八隻標緊出黎...所以成日發牙痕搵野咬...

阿仔睇準目標...

一啖咬落爸爸隻腳度...

爸爸...我下次唔敢咬你咁細力...唔好扭我耳仔啦...

可能男仔講野能力真係比女仔較慢...而家阿仔都唔係太多野講..仲係講緊d太空話...睇見其他同齡朋友仔已經識發好多個音...真係有d羡慕...不過我成日都會提醒自己...唔好將自己個仔同其他小朋友比較...人比人比c人...講野阿仔遲早都識架啦...所以唔好太急進...幸好阿仔已經分辨到誰人係誰人...總算都有點安慰...如果阿仔而家仲未知我係媽媽...我諗我心都碎埋添...有時阿仔既情緒都幾反覆...心情好時可以笑到傻晒...但惡起上黎就成日動手打人..另外...阿仔模仿能力都幾高..好似睇見姨媽搽cream...佢又會有樣學樣...

按住支cream樽口處吱吱吱

然後雙手搽搽搽...